დეფოს პირადი ფიფქია ჰყავს
იმოგენ ტომასი ორიოდე წლის წინ ირლანდიის ულამაზეს ქალად აღიარეს, მაგრამ გოგონას მთელი ბრიტანეთის დაპყრობა ჰქონდა გულში ამოჭრილი და ამ მიზნით ლონდონს მიაშურა. ბრიტანეთის დაპყრობის რა გითხრათ, მაგრამ თავიდან იმოგენმა ისეთი კაცის გული დაიპყრო, როგორიც კრიშტიანუ რონალდუ გახლავთ, მაგრამ, რადგანაც პორტუგალიელი ჩვეული არ არის გრძელვადიან რომანებს, ტომასი მალე დარჩა მარტო და ახალი საკბილოს ძებნა დაიწყო. „სრულიად შემთხვევით“, ისევ ლონდონში, „ტოტენჰემის“ ფორვარდს, ჯერმეინ დეფოს მიაგნო.
– დეფომ ის კალენდარი ნახა, რომელზეც მე ვიყავი გამოსახული და ძალიან მოეწონა. მერე მან სარეკლამო სააგენტოში დარეკა, ჩემი ტელეფონი გაიგო და ვახშმად დამპატიჟა. ვახშმობის მერე მის სახლში წავედით, მეორე დღეს კი უკვე მასთან გადავედი საცხოვრებლად, – განაცხადა იმოგენმა.
თავად დეფო კი ამბობს, რომ ტომასის სხეულით აღფრთოვანებულია, განსაკუთრებით კი მაშინ მოსწონს, როცა ქალი ფიფქიას სამოსს ირგებს. ვერ გეტყვით, გააგრძელებს თუ არა წყვილი ურთიერთობას მთელ წელიწადს, მაგრამ, მინიმუმ ძველით ახალ წლამდე ჯერმეინს სახლში საკუთარი ფიფქია ეყოლება.