ძოლა ფეხბურთელებს აზღუდებს დაჰპირდა
ლონდონის „ვესტ ჰემის“ თავკაცი ჯანფრანკო ძოლა მიმდინარე სეზონის დაწყებამდე კი აცხადებდა, ჩემი გუნდი საუკეთესო ოთხეულში მოხვედრისთვის იბრძოლებსო, მაგრამ დღეს სხვაგვარი რეალობაა – ლონდონელები პრემიერლიგაში ადგილის შენარჩუნებისთვის იბრძვიან და იტალიელი სპეციალისტი თითქოს გამოსავალს ვერ პოულობდა, მაგრამ...
„ემტივის“ დაჯილდოებაზე ბრიტანელი მომღერალი კეტი პერი სცენაზე „ვესტ ჰემის“ ემბლემიანი აზღუდით გავიდა, აქაოდა, მომღერალი კი ვარ, მაგრამ ლონდონურ კლუბს ვქომაგობ და გვერდში ვუდგავარო. როგორც ჩანს, ეს იდეა ძოლას ძალიან მოეწონა და გასულ კვირას, „ბარნლისთან“ მატჩამდე განაცხადა, თუ შეხვედრას ვერ მოვიგებთ, ჩვენს ფეხბურთელებს აზღუდებს ჩავაცმევ და ისე ვავარჯიშებო. მუქარამ გაჭრა და ლონდონელებმა ის შეხვედრა მოიგეს, თუმცა წინ მთელი ჩემპიონატია და თუ იტალიელს წარმატება მართლა სურს, სხვა რამ უნდა მოიფიქროს. მხოლოდ კეტი პერის აზღუდის იმედად ყოფნა არ გამოვა.