საქართველოს საბანკო სექტორი, მიუხედავად საკუთარ წარმატებებზე საუბრისა, გნებავთ, ტკბობისა, არ მალავს, რომ ბიზნესის დასაწყებად კრედიტებს არ გასცემს და მხოლოდ იმ კომპანიებს სთავაზობს ფინანსურ დახმარებას, ვინც საკუთარი აწყობილი ბიზნესის გაფართოებას დაგეგმავს (ისიც 17-18 პროცენტად, რაც, ექსპერტთა თქმით, საკმაოდ მაღალი პროცენტია და ცოტა ბიზნესს თუ შეუძლია, ასეთპროცენტიანი კრედიტის აღება). მეორე მხრივ, უშუალოდ მოსახლეობაში საკრედიტო ბარათების ბუმია და ხშირად ისეც ხდება, რომ ერთ ადამიანს ლამის ყველა ბანკის საკრედიტო ბარათი აქვს და ერთი ბარათიდან აღებული თანხით მეორის დავალიანებას ფარავს. რთული სათქმელია, ბანკები ითრევენ მოქალაქეებს საკრედიტო მახეში (მომხიბვლელი სარეკლამო შეთავაზებებით) თუ საკრედიტო ბარათების მახეში მოხვედრა თავად არცთუ ჯიბესავსე მოქალაქეების სურვილია, მაგრამ ფაქტია, რომ ჩვენი მოქალაქეების არცთუ მცირე ნაწილის შეგნებული ცხოვრება საბანკო პროცენტის დაფარვაში იხარჯება. ემზარ ჯგერენაიასთან ერთად შევეცდებით ქართველი ბანკებისა და მომხმარებლების საკრედიტო ცხოვრების დეტალების გარკვევას.