თავშესაფარი
„ნაცმოძრაობის“ საარჩევნო კანონმდებლობაზე მომუშავე გუნდმა თავისი გაიტანა და საარჩევნო ბარიერად 30 პროცენტი დააწესა (თავისი გაიტანა, რადგან, სახელისუფლო რესურსს პლუს ფულის წინასაარჩევნოდ დახარჯვა და – 30 პროცენტიც განაღდებულია!). ხოლო, რაკი ჯუნგლების კანონი პოლიტიკაშიც აქტუალურია, საბოლოოდ, გაიმარჯვებს ის, ვინც ძლიერია (მით უმეტეს, როდესაც მიზანი ამართლებს საშუალებას!). ასეა თუ ისე, მომავალი წლის მაისში არჩევნებიც ჩატარდება, დიდი ფულიც ჩაიდება, ბევრი ოფლიც ჩაიღვრება და, საბოლოოდ, თბილისის მერის სავარძელშიც ყველაზე აქტიური აღმოჩნდება. მოკლედ, ყველაფერი ძველებურად და ჩვეულებისამებრ გაგრძელდება, თუმცა, მთლად ძველებურადაც არა: საარჩევნო კოდექსში შეტანილი ცვლილების თანახმად, პარლამენტის წევრს ადგილობრივი თვითმმართველობის არჩევნებში მონაწილეობის მიღება პარალელურ რეჟიმში შეეძლება, რაც იმას ნიშნავს, რომ წარუმატებლობის შემთხვევაში ისევ უკან, პარლამენტში დაბრუნდება. ამ ცვლილების გათვალისწინებით კი, ვფიქრობ, სავსებით ლოგიკური იქნებოდა, საქართველოს უმაღლესი საკანონმდებლო ორგანოსთვის მოფერებით „ხელმოცარულთა თავშესაფარიც“ გვეწოდებინა.