კითხვა: რაზე მიანიშნებს ყოველ დილით ენაზე თეთრი ნადები?
პასუხი: თეთრი ნადების თხელი ფენა შეიძლება ყველა ჯანმრთელ ადამიანს ჰქონდეს. თუ ნადები უფრო სქელია, ეს მსუბუქ ფორმაში მიმდინარე დაავადებებზე მეტყველებს (ქრონიკულ, ვირუსულ-რესპირატორულ ან ფილტვებში ანთებითი პროცესის დასაწყისი). სქელი ნადები ნაწლავებში საკვების შეკავების მაჩვენებელიც შეიძლება იყოს (ყაბზობის, რომელსაც ჯერ ქრონიკული ფორმა არ აქვს). 
კითხვა: საკმაოდ დიდი ხანია ბევრს ვნერვიულობ, მაქვს ხშირი სტრესები, დეპრესიები. კვირაში 1-2-ჯერ მიწევს დალევა, თუმცა, ბევრს არ ვსვამ. სამი დღის წინ დამეწყო კანკალი, გამიხშირდა ხელისა და ქუთუთოს კუნთების უნებლიე თრთოლვა. შეიძლება, ამ ყველაფერმა თავისით გაიაროს თუ ვინმეს უნდა მივმართო?
პასუხი: აღწერის მიხედვით თქვენ გაქვთ ნევროზი ვეგეტატიური დისფუნქციით. პირველ ყოვლისა, სასმელზე უნდა თქვათ უარი, აუცილებელია დილაობით ვარჯიში და საღამოს სუფთა ჰაერზე სეირნობა. შეგიძლიათ, ანტისტრესული პრეპარატი გლიცინი მიიღოთ: თითო აბი 3-ჯერ დღეში, ენის ქვეშ, 2 თვის განმავლობაში. სასურველია ნევროლოგის კონსულტაცია.
კითხვა: შეიძლება თუ არა ხელის ძლიერი ტრავმა ეპილეფსიური შეტევის მიზეზი გახდეს (ძლიერი სისუსტე, ფერის დაკარგვა, ცივი ოფლი, კრუნჩხვა)?
პასუხი: ეს ნიშნები ძალიან ჰგავს ეპილეფსიურს, მაგრამ, შეიძლება, სისხლძარღვოვანიც იყოს. ტრავმამ ასეთი შეტევის პროვოცირება მართლაც შეიძლება მოახდინოს. დიფერენციაციისთვის საჭიროა ჩაიტაროთ ეეგ (ექოენცეფალოგრაფია), თვალის ფსკერის გამოკვლევა და ამ მონაცემებით მიხვიდეთ ნევროლოგთან კონსულტაციაზე.
კითხვა: რა არის „ჟილბერის დაავადება”?
პასუხი: ჟილბერის დაავადება, ანუ არაჰემოლიტიკური ჰიპერბილირუბინემია – ოჯახური (მემკვიდრეობითი) სიყვითლე, განპირობებულია ღვიძლის ერთ-ერთი ფერმენტის თანდაყოლილი უკმარისობით. დაავადების მიმდინარეობა ტალღისებრია. შიმშილის ან ინტენსიური ფიზიკური დატვირთვისას სისხლში ბილირუბინის რაოდენობამ შეიძლება მოიმატოს. საჭიროა სისტემატური დაკვირვება.
კითხვა: შეიძლება თუ არა მუცლის ღრუს ექოსკოპიით კუჭის წყლულის ან სხვა ცვლილებების დადგენა?
პასუხი: მუცლის ღრუს ულტრაბგერითი გამოკვლევის დროს კუჭ-ნაწლავის მდგომარეობაზე ინფორმაციის ფართო სპექტრს ვიღებთ, მაგრამ, დიაგნოზის დასაზუსტებლად აუცილებელია ენდოსკოპიური გამოკვლევა. ექოსკოპიის დასკვნის საფუძველზე კუჭის წყლულოვანი დაავადების დიაგნოზი არ ისმება.
კითხვა: ექოსკოპიაზე დამისვეს დიაგნოზი: მარცხენამხრივი პიელოექტაზია. შეიძლება თუ არა ზურგის მასაჟი და აერობიკა?
პასუხი: დასადგენია პიელოექტაზიის გამომწვევი მიზეზი. მხოლოდ გამოკვლევების შემდეგ გადაწყდება დასაშვები ფიზიკური დატვირთვების მოცულობა.
კითხვა: ჩემი გოგონა 2 წლისაა. ერთი კვირაა, შევნიშნე, რომ ზოგჯერ შარდი შემღვრეული აქვს. რა გამოკვლევები ჩავუტარო?
პასუხი: საჭიროა შარდის ანალიზი ნეჩიპორენკოს მეთოდით, ბაქტერიალური დათესვა და აუცილებლად, საშარდე სისტემის ულტრაბგერითი გამოკვლევა.
კითხვა: მაქვს ქრონიკული პიელონეფრიტი და თირკმელში კისტა. რომელ სპეციალისტს უნდა მივმართო – უროლოგს თუ ნეფროლოგს?
პასუხი: თუ კისტა დიამეტრით 5 სანტიმეტრზე მეტია, ეს უკვე ქირურგის კომპეტენციაა (ოპერაცია ენდოსკოპიურად კეთდება). გამოსაკვლევად უროლოგს უნდა მიმართოთ. პიელონეფრიტის მკურნალობა კი ორივე სპეციალისტის კომპეტენციაშია.
კითხვა: ორსულობის დროს დამისვეს დიაგნოზი: თვალის ბადურის დისტროფია. გაკეთდა ლაზერული ოპერაცია. არის თუ არა დაავადების განმეორების ალბათობა?
პასუხი: ასეთი ალბათობა არსებობს, ამიტომ, სასურველია, თვალის ფსკერის წელიწადში ერთხელ დათვალიერება.
რუბრიკას უძღვება ოჯახის ექიმი