კითხვა: შეიძლება თუ არა, აღდგომისწინა დიდმარხვის დროს მხოლოდ ოთხშაბათსა და პარასკევს ვიმარხულო?

პასუხი: თვითნებურად ნუ დაიკანონებთ მარხვას, შეათანხმეთ მოძღვართან. თუ თქვენ ეკლესიის შვილად მიიჩნევთ თავს, თვითნებურად ნუ იმოქმედებთ. თუ რამე სერიოზული მიზეზი გაქვთ ჯანმრთელობის მხრივ, მოძღვარი გაითვალისწინებს და ისე დაგიწესებთ მარხვის კანონს.

კითხვა: ძალიან მაწუხებს სახსრები, ასაკითაც პატარა აღარ ვარ, ამიტომ, ლოცვისას ძალიან მიჭირს მუხლმოყრა და მეტანიის შესრულება. ცოდვად ხომ არ ჩამეთვლება ეს?

პასუხი: უფალი ჩვენგან არ ითხოვს ჩვენი ძალების გადაჭარბებულად, ზომაზე მეტად დაძაბვას. ამიტომ, მუხლმოყრა შეასრულეთ თქვენი შესაძლებლობების ფარგლებში.

კითხვა: უმძიმესი ცოდვა ჩავიდინე ახალგაზრდობაში – ჩემს ნათლიაზე განაწყენებული, მის ჯინაზე გადავინათლე. მღვდელს, რა თქმა უნდა, დავუმალე პირველი ნათლობის ამბავი და მან ჩვეულებრივად შეასრულა ნათლობის საიდუმლო. როგორ მოვიქცე?

პასუხი: არ არსებობს ცოდვა, რომელიც უფლის კაცთმოყვარეობას აღემატება. თქვენს ცოდვასაც ეშველება, თუ გულწრფელად მოინანიებთ მოძღვართან.

კითხვა: სიზმარში ვნახე ჩემი გარდაცვლილი ახლობელი, რომელმაც დამწყევლა. ძალიან განვიცდი. რას უნდა ნიშნავდეს ეს?

პასუხი: თუ სიზმარს ყურადღებას არ მიაქცევთ – არაფერს არ ნიშნავს, მაგრამ, თუ აჰყვებით თქვენს სიზმარს, შეიძლება, სერიოზულ პრობლემად გექცეთ და ეშმაკსაც სწორედ ეს უნდა – რაიმე ფორმით აგიხდინოთ სიზმარი, რათა მასზე დამოკიდებული გაგხადოთ. დაივიწყეთ სიზმარი, ილოცეთ და იყავით მშვიდად.