უკრაინული საფეხბურთო კლუბის, დონეცკის „შახტარის” მილიარდერმა პრეზიდენტმა, რინატ ახმეტოვმა განაცხადა, რომ მთავარი მწვრთნელის, მირჩა ლუჩესკუს არყოფნისას თავად გაწვრთნის გუნდს. 6 იანვარს რუმინელი სპეციალისტი ბუქარესტში ავტოავარიაში მოყვა და დღემდე მკურნალობს. ახმეტოვმა საავადმყოფოში მოინახულა ლუჩესკუ, იქიდან გამოსულს კი ჟურნალისტების კითხვაზე, თუ ვინ უთავკაცებს გუნდს დროებითო, უპასუხა: „მე გავწვრთნი, მე ვარ მწვრთნელი”. ლუჩესკუ დაახლოებით ერთი თვის განმავლობაში ვერ დაეხმარება კლუბს, ამ პერიოდში „შახტარის” გაწვრთნაში ახმეტოვს მისი თანაშემწეები დაეხმარებიან. შეგახსენებთ, რომ რამდენიმე დღის წინ „შახტარმა” ქართველი ფეხბურთელი, დავით თარგამაძე გადაიბირა, რომელიც დროებით უკრაინულ „ილიჩოვეცში” გაანათხოვრა.