კითხვა: როგორი შემადგენლობის უნდა იყოს მიმიკური ნაოჭების საწინააღმდეგო კრემი?

პასუხი: ასეთი კრემი სხვადასხვა შემადგენლობის არსებობს, მაგრამ, მათ შორის ერთ-ერთი საუკეთესოა ის, რომლის შემადგენლობაშიც შედის უმაღლესი ხარისხის ზეითუნის ზეთი, ვიტამინი E და ბროწეულის ექსტრაქტი.

კითხვა: აქვს თუ არა ვარგისიანობის ვადა თვალის „ჩრდილებს“?

პასუხი: გაუხსნელი კოლოფით თვალების „ჩრდილი“ ინახება 3,5, ხოლო გახსნილი კოლოფით – 1 წლის განმავლობაში. მაგრამ, მისი ვარგისიანობის დადგენა დაყნოსვითაც შეიძლება. თუ იგრძენით, რომ მას უსიამოვნო, ოდნავ მომწარო სუნი დაჰკრავს, არ დაგენანოთ, ისე გადააგდეთ.

კითხვა: რას ნიშნავს – „თმის შეღებვა 3D“?

პასუხი: ასეთი შეღებვა ვიზუალურად ზრდის თმის მოცულობას, რაც ხდება ერთი ფერის სამი ტონალობის ერთმანეთთან შერწყმით. 3D შეღებვისთვის იყენებენ თმის საღებავს, რომლის 85 პროცენტი ნატურალური ინგრედიენტებისგან შედგება.

კითხვა: როგორ უნდა გამოვიყენო ეგრეთ წოდებული „ავტორუჯი“, რომ „ნამზეური“ ბუნებრივად გამოიყურებოდეს?

პასუხი: შედარებით ბაცი ტონალობის „ავტორუჯი“ წაისვით თხელ ფენად და სახეზე თანაბრად გადაინაწილეთ ხაოიანი პირსახოცით.

გახსოვდეთ: „ავტორუჯის“ წასმა არ შეიძლება, თუ თუნდაც მცირე რაოდენობით გაქვთ მიღებული ალკოჰოლური სასმელი, რადგან, ალკოჰოლი არღვევს კანის PH (მჟავატუტოვან) ბალანსს, აშრობს მას და, შესაძლოა, „ავტორუჯი“ ლაქებად დაგაჩნდეთ.

კითხვა: როგორი აბაზანა უნდა მივიღო ნივთიერებათა ცვლის მოწესრიგების მიზნით? მითხრეს, რომ ეს ხელს უწყობს გახდომას.

პასუხი: ნივთიერებათა ცვლის მოწესრიგება ნამდვილად უწყობს ხელს გახდომასაც და, ზოგადად, ორგანიზმის გაჯანსაღებასაც.

გაავსეთ აბაზანა ცხელი (40-გრადუსიანი) წყლით და ჩაყარეთ ზღვის მარილი. ასეთ აბაზანაში გაჩერების მაქსიმალური ხანგრძლივობაა 5 წუთი. თან, ისე უნდა ჩაწვეთ, რომ წყალი გულის არეს არ ფარავდეს.

კითხვა: ზამთრის პერიოდში ხელები ძალიან მეყინება (თუნდაც თბილი ხელთათმანი მეცვას), რის შემდეგაც კანი მიწითლდება და მისკდება. გთხოვთ, მასწავლოთ რამე ხალხური საშუალება, რომ ეს პრობლემა მოვაგვარო.

პასუხი: ღრმა ჯამში ჩაასხით გვირილის, სალბის, პიტნის, კამისა და ცაცხვის ყვავილის ნაყენების თითო ჩაის კოვზი, დაასხით 1 ლიტრი მდუღარე წყალი, დაახურეთ თავზე და გააჩერეთ 15-20 წუთი. ჩაყავით ჯამში ხელები 10-15 წუთის განმავლობაში, შემდეგ ოდნავ შეიმშრალეთ და წაისვით გლიცერინი, რომელშიც რამდენიმე წვეთი ლიმონის წვენი იქნება შერეული.

აბაზანის გაკეთება აუცილებელია ორ დღეში ერთხელ მაინც.