15 ნოემბერს კომპანია „მარიგოლდი“ თბილისის „არტ-ჰოლში“ ბრენდ „ბუქიის“ პრეზენტაციას გამართავს. პირველად საქართველოში, დიზაინერმა თამარ ნადირაძემ გამოუშვა საქორწილო კაბების კატალოგი, რომელიც საფრანგეთისთვის არის განკუთვნილი. კომპანია „მარიგოლდი“ ასევე პარიზში ხსნის საქორწილო კაბების მაღაზიას. კატალოგში, რომელიც საფრანგეთში გავრცელდება, შესულია 110 საქორწილო და ქართული ნაციონალური კაბა, გაფორმებული თანამედროვე ელემენტებით. კოლექციაში გამოყენებულია ქართული ტექსტილ-თექა. პრეზენტაციაზე მისულ სტუმრებს დაურიგდებათ მინი-კატალოგები. ფოტოების გადაღება უზრუნველყო „ფოტოლაივ სტუდიომ“ და საბერძნეთიდან მოწვეულმა ფოტოგრაფმა ნიკა საბულუამ. კატალოგში შესულია „კიკალა-სტუდიოს“ და ფოტოგრაფ ნუკრი ჯიოშვილის გადაღებული ფოტოები. პრეზენტაციაზე კი წარმოდგენილი იქნება კატალოგში შესული 14 საქორწილო და 6 ნაციონალური კაბა. საღამოს დაასრულებს ქართული ნაციონალური ტანსაცმლის ჩვენება.