გია ფერაძე ის ადამიანი იყო, ვისაც თბილისში მისამართი არ სჭირდებოდა. მისთვის ყველა სახლის კარი ღია იყო და მისი სტუმრობა –  ყველა ოჯახში ზეიმი. სამწუხაროდ, ერთმა საბედისწერო შემთხვევამ მისი ცხოვრება ძირფესვიანად შეცვალა და, ხალისიანი და მუდამ იუმორით აღსავსე გია, ბევრისთვის მხოლოდ მოგონებაში დარჩა.

გიას ოჯახმა იცოდა, რომ მას რუსეთში, ერთი უმშვენიერესი ქალბატონისგან შვილი ჰყავდა, რომელსაც ასევე გია ერქვა და სურათებში ორი წვეთი წყალივით ჰგავდა მამას. ამის შესახებ გიას ძმა ილიკო ფერაძეც იუწყებოდა თავის წიგნში გიას შესახებ. გიას გარდაცვალების შემდეგ კი გაქრა მათთან კავშირი. ოჯახმა მისი ძებნა დაიწყო, თუმცა უშედეგოდ. დღეს კი, ბედნიერი შემთხვევისა და ინტერნეტის წყალობით, გია ფერაძის ვაჟი, 26 წლის უმცროსი გია ფერაძე, რომელიც დღეს, მეურვე ბაბუის – კუზუბოვის გვარს ატარებს, თბილისშია და უახლოესი ნათესავების გარემოცვაში თავს ბედნიერად გრძნობს. როგორც თავად გაგვანდო, ორ წელიწადში ქალაქ სამარადან საქართველოში გეგმავს გადმოსახლებასა და დაფუძნებას.