კითხვა: ორსულობის ვადა 16 კვირაა. აღმომიჩინეს ქლამიდიოზი. ექოსკოპიით ყველაფერი კარგად არის. რას მირჩევთ?
პასუხი: ორსულობაზე ქლამიდიოზმა შეიძლება ნეგატიური გავლენა მოახდინოს. ამიტომ, აუცილებლად უნდა იმკურნალოთ, მაგრამ როდესაც ორსულობის ვადა 19-20 კვირა იქნება. ამ ვადაზე  ჩამოყალიბებული პლაცენტა უკეთესად დაიცავს ნაყოფს ანტიბიოტიკებისგან.
კითხვა: რა არის სარძევე ჯირკვლების დიფუზური მასტოპათია და ფიბროადენომა?
პასუხი: დიფუზური მასტოპათიის დროს, სარძევე ჯირკვლის ნორმალური ქსოვილის შემაერთებელი ქსოვილით (ფიბროზი) ან კისტებით ჩანაცვლება ხდება. ამას შეიძლება ჰქონდეს შერეული ხასიათი. ფიბროადენომა – ჯირკვლოვანი და შემაერთებელ ქსოვილთა კეთილთვისებიანი სიმსივნეა. სარძევე ჯირკვლების დაავადებების დროს უნდა მიმართოთ მამოლოგს.
კითხვა: 1,5 წლის ბავშვს ბოლო დროს ცხვირიდან სისხლდენა გაუხშირდა. საშიშია თუ არა ეს?
პასუხი: ცხვირიდან ხშირი სისხლდენა შეიძლება, მომატებულმა შიდაქალის წნევამ ან სისხლის შედედების დარღვევამ გამოიწვიოს. ამ დაავადებების გამოსარიცხად მიმართეთ ნევროლოგს და ჰემატოლოგს.
კითხვა: ექიმმა გვირჩია, ყოველი აცრის წინ ბავშვისთვის ანტიჰისტამინური პრეპარატების მიცემა. რისთვის?
პასუხი: ანტიჰისტამინური პრეპარატების მოკლე კურსით მიღება აცრამდე (2-3 დღე) და 2-3 დღე აცრის შემდეგ (სულ 5-7 დღე), არ არის საშიში, სამაგიეროდ, აგარიდებთ მწვავე ალერგიულ რეაქციებს.
კითხვა: რისგან შეიძლება, საშუალო ასაკის მამაკაცს ზამთარ-ზაფხულ ჰქონდეს ძლიერი ოფლიანობა (თითქოს წყალი გადაასხეს) და პირის სიმშრალე?
პასუხი: უპირველესად, შაქრიანი დიაბეტი და ფარისებრი ჯირკვლის დაავადებები უნდა გამოირიცხოს.
კითხვა: ჩემს 10 წლის გოგონას აქვს ჭარბი ოფლიანობა, თან უსიამოვნო სუნით.
პასუხი: უპირველესად ოფლიანობის მიზეზი უნდა იპოვოთ. ხშირად ეს დაკავშირებულია ნერვული სისტემის დარღვევებთან (ვეგეტო-სისხლძარღვოვანი დისტონია), ფარისებრი ჯირკვლის ფუნქციის მომატებასთან, ზოგჯერ – ქრონიკულ ინფექციებთან (უნდა დაგაფიქროთ ღამის ოფლიანობამ), სპეციფიკური ოფლის სუნი იცის ნივთიერებათა ცვლის დარღვევამ.